Младите миленичиња на возраст до 12 недели се прочистуваат од внатрешни паразити на секои две недели. Еднаш месечно се прочистуваат до достигнување на возраст од 6 месеци, а по таа возраст е доволно да се третираат на секои три месеци. 

Постои тенденција да се фокусираме на вакцинациите на нашите миленичиња во нивните рани години, но како што тие стареат нивниот имунолошки систем станува послаб, па затоа е важно редовно да се одржува заштитата кон заразните болести, преку ревакцинација. Вашиот ветеринар треба редовно да ве информира за појавата на било какви епидемии на заразна болест во вашата област.

Проблемот со бездомните животни во нашата држава е сериозен, па затоа препорачуваме стерилизација на женските миленичиња, и кастрација на машките миленичиња на возраст помеѓу шест месеци и една година. Но, секогаш постојат исклучоци врз основа на возраста, тежината и здравствената состојба. Вашиот ветеринар ќе ве извести кога е вистинското време.

Начинот на исхрана не е нешто што е заедничко за сите видови животни и зависи од повеќе фактори: здравјето на вашето милениче, возраста и расата. Исто како што нашата диета влијае на тоа како се чувствуваме, важно е да се придржувате кон правилната исхрана на вашето милениче- затоа не заборавајте да се консултирате со вашиот матичен ветеринар. Ветеринарот ќе ве советува со што да го храните миленичето од најрана до најстара возраст, вклучувајќи и во периодите на несакани состојби како болест.